البوست ده عن بوتة..

عن القطة الجميلة اللي عندنا.. سوري، عند أهلي في البيت دلوقت

بوتة ماكانتش بتقرب من أهلي أوي، كانت بتحبني أكتر

بتيجي الصبح تلحس في ايدي وراسي وتصحيني عشان العب معاها

بتنام على سريري بالليل

ووقت ما سبت البيت كانت بتنام على مخدتي

بوتة لسبب ما مكروهة من أمها، توتة، دايما توتة تهجم عليها وتعورها

كنا بنخليها معايا في أي أوضة ببقى فيها

في خلال الكام شهر اللي كنت مش بروح فيهم البيت،

بوتة بقت بتقعد وتنام فوق التلاجة بالساعات وتنزل يا دوب للحمام والأكل

ونادرا لما تنزل تتمشى في الشقة حتى واحنا حابسين توتة في اوضة تانية

لما شفت بوتة تاني..

بوتة كان عندها اكتئاب، اعصابها بايظة، شكلها متبهدل، ومطفية..

وبوتة ماعرفتنيش....

ما قربتش مني..

وبقت ماتستريحش لما بشيلها..

ولو نزلتها عالأرض بتخاف وتطلع فوق التلاجة تاني

بوتة قابلة اني العب في دقنها فوق التلاجة

ولو سحبت ايدي بتحاول تمسك فيها أو تعضها عشان العب معاها تاني..

بس ده كل اللي كنت اقدر اعمله معاها.............

دلوقت أنا بحاول أصلح ده، نضفت الشقة كويس من بودرة الصراصير،

بجيب البوكس والفرش عشان اجيبها عندي

أنا عارف إنها مش هتبقى مرتاحة أول كام اسبوع

أنا كنت المفروض اجيبها معايا من بدري

كانت زمانها أحسن دلوقت، حتى لو كنت مش موجود في البيت طول الوقت،

كانت هتبقى بتاكل معايا بالليل ونايمة جنبي

أنا مش مبسوط بنفسي وأنا بكتب البوست ده

بس أتمنى  إنها ترجع كويسة وماتبقاش مكتئبة

وتغفر لي أنانيتي وإني ماقدّرتش قد ايه أنا كنت فارق معاها

وترجع تنوّر تاني زي ما كنت بشوفها معايا طول الوقت.