Monday 31 December 2012

المفروشات، ما ذنب المفروشات؟!

0 comments

الفيديو ده أنا مصوره لـ نفق سيدي جابر
بعد ما بئا مليان بياعين فارشين حاجتهم عـ الأرض
والناس مابئتش عارفة تمشي
أنا عارف الصورة زي الزفت
بس ده اللي قدرت عليه بـ كاميرا الموبايل والإضاءة بتاع المكان

أنا بقترح إن الحكومة توفر لهم أكشاك جوه النفق*
بدل ما الناس ماشية تتكعبل في حاجاتهم كدة
دا أكل عيش ناس برضه
وايه يعني البني آدمين مش عارفة تمشي
فيه مزلقان المحطة فوق يقدرو يبقو يعدّو منه


أنا مش متوقع حاجة من شرطة المرافق
ومش عارف الناس هتفضل ساكتة عليهم لحد امتا
مستني اليوم اللي نيجي فيه ونشيل حاجتهم من النفق
ومانخليهمش يرجعو تاني
هييجي حد ويقول
"يعني انتا عايزه ينحرف ويبئا بلطجي؟ خليه يبيع حاجته هنا بدل ما يبئا بلطجي "
هقول له الحوار ده لما يبئا فيه حيز مكان واسع
بس ماينفعش في مكان ضيق أصلا وزحمة جدا
آجي افرش حاجتي وازنق الناس واضيّق سكتهم

وبعدين هو مش هيبئا فيه مول تجاري في محطة سيدي جابر
مش كانو يخصصو كام محل للناس دول
بدل ماهما فارشين في الشارع كدة؟

المفروض دلوقت إني اختم كلامي بأي حاجة
بس أنا مش عارف أقول ايه
فـ عشان كدة أنا هقفل
 

تصبحو على خير :) ـ


رووون

 

 -----

أنا بهزّر على فكرة! ـ *

Friday 30 November 2012

0 comments


The last thing we see is obsession, depth of insanity

آخر شيء نراه هو الهوس، عمق الجنون


Totla Mad by Periphery

Sunday 25 November 2012

2 comments
التلات الجاي إن شاء الله نازل مع الثوار
يوم التلات عندي درسين هخلّص الأولاني الساعة 5 وهلغي التاني وهطلع على مكان التظاهر
إن شاء الله بكرا أو بعده أحضّر نفسي و نزل اشتري من عند الأمن الصناعي قناع غاز ونظارة وخوذة

الإخوان مختارين التلات يوم ينزلو يأيدو مرسي رغم إنهم عارفين إننا حددنا اليوم ده للتظاهر ضد قراراته
يعني هما نازلين وناويين يتصادمو معانا
وهتبئا معركة
تكبر وتبئا حرب أهلية بئا أو ماتبئاش
احنا خلاص جبنا آخرنا معاهم

الإخوان هيخربوها على نفسهم
وهتحصل إشتباكات بين الثوار في جانب والجانب التاني الداخلية وهيساعدها الإخوان وبعض الإسلاميين
وهتقوم الثورة زي ما كان المفروض تقوم وهنتجنب المرة دي كل الأخطاء اللي عملناها و وصّلتنا لـ اللي احنا فيه دلوقت
هيبئا فيه دم كتير
بس في الآخر إن شاء الله كل حاجة هبتئا زي ماحنا عايزين وزي ماكان المفروض يحصل 
 



--------------------------------------------------


مشهد تخيّلي.. ـ

جحافل من المصريين تجتاح مقار الإخوان وحزبهم وكل من والاهم حرقًا وتحطيمًا.. تقتحم مساكن قياداتهم وتقتلهم ضربًا وسحلاً في الشوارع..بعضهم ينكشف مجرد مذعور مستميت على السلطة فاجئته قبضة الثورة بالموت المريع فيعلن جزعه تبولاً لا إراديًا منه أمام الكاميرات والبعض الآخر يحاول سبك الدور وجعل نفسه أيقونة استشهادية عله يجد لنفسه محشرًا في بقعة مضيئة بخفوت في التاريخ.. شباب الإخوان يستبسلون في
حماية أسيادهم ويُسقِطون منا الآلاف.. لكننا معشر الثوار نمزقهم كل ممزق ونصنع منهم شهداء وهميين لشراذمهم الفارة خارج البلاد.. تُعلَن الجماعة محظورة مرة أخرى ونُطلِق الأحكام بالإعدام والنفي والسجن السحيق لبقاياها.. ثم نبني مصر على أساس من التسامح والمواطنة وتقبل الآخر وتداول السلطة ديموقراطيًا... ـ

تُرى هل يتحقق يومًا هذا الحلم الجميل؟  
 


سنقيم الجمهورية من جديد، في الآخر سنقيم الجمهورية، وستتسع لكل ألوان الطيف المصرية، وسنسأل أنفسنا ساعتها: فيم كان كل هذا الانتظار والصراع؟

د. عزالدين شكري فشير --
 
 
 
----------------------------------------------------

على الهامش: يمكن لو ماكانش عندي ثانوية عامة
كان زماني قرأت في السياسة كتير وعن الثورة الفرنسية والثورات التانية
وقرأت أكتر عن الأناركية (الفكر اللي أنا هعتنقه إن شاء الله) ـ
وكان زمان عقلي/فكري في السياسة وفي باقي الحاجات أحسن مما هو عليه دلوقت
 بس غصب عني :(    ـ

Friday 23 November 2012

عن مرحلة م

0 comments
سألته: " انتا ليه ماعندكش جيرل فريند؟ " ـ
" أنا زمان كنت عايز يبئا عندي جيرل فريند، بس دلوقتي مابئيتش شايف إن الموضوع مهم أوي في سني ده " -
قالت له (بابتسامة): " طيب لما تغير رأيك ابئا قل لي " ـ

بس النظرة اللي كانت في عينيه قالتلها إنه حتى لو غير رأيه وبئا عنده جيرل فريند.. مش هتبئا هي.. ـ


---------------/---------------/----------------


وبينما كانا يسيران سويا، ووسط الضجيج والزحام وعوادم السيارات، مال عليها وبكل رومانسية قال لها: " أنا شكلي هحبك يا بت! " ـ
بس البعيد كان اتأخر أوي لحد ماهي كانت عدت إعجابها بيه وحبت واحد تاني!.. ـ


---------------/---------------/----------------


ما لم يقوله لها هو أنه قد تغلب على إعجابه بها منذ شهور وأنه فقط كان يريد أحد يرتاح إليه لـيتحدث معه


---------------/---------------/----------------

Tuesday 20 November 2012

1 comments
متأخر جدا ييجي اربع حصص من المذاكرة عليا ماخلصتهاش
احساس بالقلق والتوتر والخوف من الفشل بدأ يلائي له مكان جوايا
رغم إن لسا المراجعة ما بدأتش ولا الشغل تقل
أنا حاسس بالضغط الكبير والمسئولية التقيلة أوي عليا
إني الحق اللي وقع مني وإني اذاكر الجديد اللي بـ اخده
مش لائي العزيمة إني اشتغل بجد واؤدي كويس
أنا بجد عايز بس مش عارف
أنا خايف أوصل لمرحلة إني أقوم رامي كل حاجة وابطل حتى محاولاتي شبه الناجحة للمذاكرة وإني احسن من مستوايا الدراسي
أنا مش عارف اثبّت الحماس للمذاكرة اللي بـ ابئا حاسس بيه واكمّل على كدة وانجز اللي عليّا
ولا عارف اعمل أي حاجة
أنا تعبان
تعبان أوي

Friday 26 October 2012

0 comments
كل سنة وانتو طيبين
:)

يعني .. أنا حبيت استغل الفرصة بتاعت الأجازة واكتب الكام كلمة اللي عايز اكتبهم من أول السنة
نبدأ بئا..ـ


من الحاجات اللي كان نفسي فيها لما كنت بلائي المرور واقف
إن أقعد أجري على العربيات
وانط من واحدة للتانية

يبئا الراجل قاعد في أمان الله بيلعب كوتشينة مع مراته عبال اما السكة تفك
يلائي اللي هبط على سقف عربيته فجأة وقام ناطط على شنطة العربية الي بعديها

طبعا مش هيبئا بـ يجري عادي كدة وإلا هيتقفش والناس هتفقعه
أنا متخيّله هيبئا مغطي وشه بـ قناع غاز
 عشان مايتعرفش وبالمرة عشان يحمي صدرة من العوادم


أو يبئا زي البرنس ده


بس الأحلي إنه مايبئاش لوحده
يبئو اتنين تلاتة بـ يتسابقو 
أو اللي يوصل أبعد مسافة قبل ما السكة تفتح والعربيات تتحرك

دي لسا مجرد فكرة دماغي بس هيا عمالة تكبر ومش عارف إن كنت هنفذها ولا لأ

بس لو لئيتو حد بـ ينط عـ العربيات والسكة واقفة: البرنس دا أنا ماعرفوش ولا ليا دعوة بيه
إن لحقتوه ابقو اتصرفو معاه

Thursday 11 October 2012

العُرس

8 comments
احجل بعيد ياموت
بعيد عن الناس .. والبيوت
لسه الحياه
يادوبها بتدب فى عروق مولودى
كبلتنى بالقيد فى ليلة عرسى قصفتنى ودريتنى
فأخضر النوار على عودى
العرس ماردته ولا المكان حبيته بس الحليب هتطق بى نهودى وان يسألوكم مينابوه قولوا ده خدها غصب
ده ابنى انا وحدى شكلته فى حشاى ايده الصغيره دى غازلتها وغازلتنى وحاربت الموت معاى



غناء: دينا الوديدي ومريم صالح


lyrics by : Mohamed Seif
Compose - Singers : Dina Elwedidi & Maryam Saleh
Music arrangement : Nancy Mounir
Violin Guitar كولة : Nancy Mounir
Guitar : Mahmoud siam
Bass guitar : Seka
Doff : Sherif ezzet
Sound Engineer : Rafi2 Adly

Sunday 7 October 2012

فراغ

0 comments
لدي من الفراغ ما يكفي أن أحلم حلمين مختلفين تماما في يومين متتاليين وأن استيقظ لأبكي على كل واحد فيهما وعلى الواقع الذي أعيش فيه

Sunday 30 September 2012

ميشو (18-8 2011 » 15-9-2012) ـ

4 comments
 ـ ” يا هِرُّ فارقتنا ولم تعُدِ … وكنت منّا بمنزل الولد“ ـ
لـ ابن العلاف

---------------------------



كان أكبر اخواته في الحجم
وكانت ملامحه جميلة أوي
كان الوحيد فيهم اللي بيحبني
كان بيحب يقعد جنبي ولو جه ولقى باب الأوضة مقفول يقعد ينونو لحد ما افتح الباب وأدخله
ساعات كان بينام جنبي بس ده ماكانش بـ يحصل كتير ﻷني كنت بخاف اتغابى عليه وأنا نايم
 


لما كنت بـ ابقى قاعد عالسرير بذاكر أو بقرأ كان بيطلع جنبي
عشان اقعد اطبطب عليه
كان غاوي يجيلي وأنا مشغول ومش فاضي
لما كنت ابئا بـ اصلّي أو بـ اجهز عشان اروح درس الائيه جالي
 وكنت كل مرة بقول له "معلش يا ميشو أنا مش فاضي دلوقت لما هخلص هعمل لك كل اللي انتا عايزه
وكان فعلا بيستناني :) ـ
بس هو غالبا ماكانش بـ يعبرني غير لما بكون مشغول، لدرجة إني ساعات بفكر إن فيه شيطان جواه مهمته إنه يقطع عليا صلاتي أو يأخرني عن دروسي




ايه اللي اخرك يا نور؟؟ ـ )
معلش يا مستر أصل ميشو كان عايزني اعمل له مساج! ) ـ

---------------------------

لحد ماتعب.... ساعتها خس اوي وبئا هزيل خالص
رحنا بيه لدكاترة كتير كل واحد يكتبله على علاج مختلف
ماحدش عارف ماله وكلهم بيكتبوله على حقن وادوية وهما مش متأكدين من النتيجة
وفضلت حالته عمالة تسوء
يمكن احنا كنا عارفين إنه هيموت
بس كل واحد فينا كان معتمد على محاولات التاني إنه يطمنه
إن ميشو هيبقى كويس وهيرجع زي ماكان
رغم إنه عارف وهو عارف إن دا مجرد كلام مش هـ يحصل
بس كان لسا بيعرف يلعب ويجري
وبعدين مابئاش بيتحرك.. بقت حركته قليلة أوي

---------------------------

أمه ماكانتش راضية تخش الأوضه اللي هو فيها
حتى لما دخلناها كانت خايفة، بخت وطلعت جري
يمكن كانت حاسة بالموت وهو موجود في المكان

الجمعة 14/9/12
كان تعبان أوي وماكناش عارفين نروح بيه فين
النهارده أجازة وكل العيادات البيطرية قافلة
اشمعنى البني آدمين بس اللي العيادات مفتوحالهم كل يوم
فضلنا اليوم ده نقول له معلش يا ميشو بكرا الصبح هنوديك ﻷقرب دكتور
بس هو ماستحملش

يوم السبت الصبح
كنت قايم عشان اخلص واجب درس.
بعد ماقمت بفترة وأنا قاعد بنجز لئيت ماما بتقول لي إن ميشو مات
وﻷن مافيش مكان ندفنه فيه غير في الجنينة اللي جنب بيتنا فـ احنا قررنا ندفنه بالليل عشان ماحدش يشوفنا

---------------------------


12:15am, Sun 16-09-2012
أنا نازل ادفن ميشو دلوقت............ ـ

---------------------------

دا تاني قط تبعنا ادفنه في حياتي، هو أنا المفروض بئا اتعود على كدة ؟؟!..... ـ


Monday 10 September 2012

لقاء المدونين بإسكندرية 7/9/12

9 comments
 الجمعة 7 سبتمبر 2012

النهارده لقاء المدونين في إسكندرية
صحيت الساعة 8
جهزت ونزلت، الجو رايق والدنيا هادية وكله اشطة
وصلت هناك عـ الساعة 10
ماكانش فيه غير أسامة الأزهري
 وعلى 10:30 كدة وصلت دودو (عاشقة الرومانسية) ـ

وبعدين وصل أستاذ أسامة (حواديت) بـ صحبة أحد أصدقاؤه
ومدام مرمر (ركن المرأة) و د. عصام (أحوال الهوى)  وإيمان (الحب الجميل) ـ
وضياء (بيبان) ـ (secret emotions) و سحر 
وقعدنا على كافيه** جنب القلعة
مستنيين بائي الناس اللي جاية من برا إسكندرية
واللي كانو متكعبلين في حوار السفر، بس الحمد لله وصلو عـ الصلاة كدة

ساعة الصلاة رحنا القلعة وصلينا في المسجد اللي فيها
وبعد ما خلصنا كانو اللي جايين من القاهرة وصلو
  اللي حضرو كانو ماما فاتيما و أبلة رشا عرابي*(لقد خلقنا الله أحرارا)  و أستاذ محمد متولي (رحلة حياة) و كابتن عمرو يسري (فضفضه) 
ـ (Gray Rose) و مستر محمود بهجت
و حروف كلاسيكية ،Emerald.Oasis و ناس تانية ماعرفش أساميهم بس مدوناتهم:  قوس قزح، و
و نبض إسكندرية، وطعم البيوت


قعدنا نلف شوية في القلعة
وبعدين طلعنا على تكا وقعدنا نتغدى و نريح مـ الحر ونتكلم وكدة 
وكان فيه واحدة جت يادوب قالت إسم مدونتها ومشت على طول 
 وكان نص اللي قاعدين مش عارفين الإسم والنص التاني ماسعمهوش كويس! :) ـ
المدونة إسمها: " بلاعة الحكومه تغنيك عن شبشب اللئيم "ـ

وبعد ما أكلنا بشوية عملوا حفلة عيد ميلاد أبلة رشا

والأزهري بئا كان ناوي يطبق عـ التورتة كلها (كالعادة يا جماعة، إحنا بـ نتكلم عن مين يعني) ـ
لولا دفاع دودو المستميت عن حق بائي الناس في إنها تاكل :) ـ

وبعد كدة رجعنا و ركبنا مركب

والجو بئا والغروب.. الحوار على بعضه كان وهم :)) ـ
وبعد كدة رحنا عند عزة اللي جنب القلعة وأكلنا ـ أكيد آيس كريم يعني مش محتاجة فقاقة ـ
وبعدين سلمنا ومشينا
وفضلت أنا مع عمرو يسري و محمد متولي وماما فاتيما وأبلة رشا  ودودو ومدونتين كمان
رحنا لحد محطة مصر وهناك هما ركبو المشروع وأنا روحت

أنا مش لائي كلمات توصف سعادتي باليوم ده
أنا بجد انبسط جدا النهارده
 :))))))))))))))
وشكرا لكل الناس اللي حضرتك وأنا اتشرفت بـ مقابلتكو :)   ـ
وإن شاء الله نتجمع تاني قريب

رووون


-----

(أنا آسف لو نسيت إسم حد من الحاضرين، أنا الذاكرة بتاعتي زي الزفت)
سؤال لأبلة رشا: حلوة أبلة دي؟ ـ *

قهوة: قلعة السيسي! ـ **
-----

Sunday 26 August 2012

You see what you started?

0 comments

الصورة دي مش فوتوشوب
الأطفال دول اتشوّهو نتيجة لـ تعرضهم قبل الولادة لـ الديوكسين في مبيد العامل البرتقالي
أحد المبيدات اللي استخدمها الجيش الأمريكي في حربه على فيتنام
كـ جزء من برنامج الحرب السامة


اللينكات

Tuesday 31 July 2012

!جبت كام يا حبيبي؟

4 comments
يوم صدور نتيجة الثانوية العامة ..     ـ     
حدث عالمي يتابعه المصريين من باب الفضول فقط
و يتابعه العالم عشان يطمئن إلى
إننا كل سنة بـ ننتج آلاف البهايم اللي مش نافعين بـ بصلة

آلاف الشباب المتوترين من ساعة ما خلصو امتحانات مترقبين اللحظة دي
طبعا احنا عارفين انها هتطلع على بالليل كدة

أنا ماكنتش حاسس بـ أي حاجة يومها
صاحي عادي جدا
رحت قعدت عـ الكومبيوتر عادي جدا
ولا حاسس بقلق ولا حاسس بـ أي حاجة
لا و ايه
كنت خارج مع قرايبي نتغدى برا كمان

المهم، أثناء وجودي مع قرايبي لسا
فتحت موقع الوزارة من الموبايل
قعدت بئا ييجي ربع ساعة بحاول افتكر/أكتب رقم الجلوس بتاعي  صح
أخيرا لما ربنا كرمني و كتبته صح كان فيه اتنين على الأقل اتصلو هزءوني على إني لسا ماجبتهاش
والحمد لله جبتها والمجموع كان كويس

و من ساعتها بدأت الائي كم هائل من الفضول البشري محيط بيّا
لاحظت إن الناس كلها بتسأل: جبت كام ؟
مش: عملت ايه ؟
وفيه فرق كبير بين السؤالين
قرايبي بئا عمالين يتصلو عشان يعرفو أنا جبت كام
وأنا ضايقني جدا كون إن كلهم عايزين يعرفو المجموع
مش هاممهم إني نجحت ومش مكفيهم إني أقولهم إني مجموعي كويس
فـ أنا قررت مااقولش لحد على مجموعي وخصوصا قرايبي
طبعا هما اتضايقو مني
ناسيين - أو عاملين عبدو - إن دي حريتي، وإن أنا من حقي اختار إذا كنت أقول للناس ولا لأ
رغم إن الناس دي برضه
مابتقولش هي جابت كام
ولا نعرف ولادهم جابو كام
ولا احنا سألنا ولا عايزين نعرف أصلا
رغم كدة هما عمالين يزنّو عايزين يعرفو

هي الناس ليه بتدور على المجموع بس ؟؟
هو مش اللي يهمها تعرفه بس أنا عملت ايه (نجحت الحمد لله) و أنا عايز اخش كلية ايه و أنا عايز ابئا ايه في الحياة ؟؟
هما ليه بيتدخلوا في اللي مالهمش فيه ؟؟
وليه الناس بـ تقيم البني آدم على أساس المجموع بتاعه ؟؟
مع إن فيه ناس كتيرة عظيمة ناجحة في الحياة و ماكانتش جايبة مجموع عالي في ثانوية عامة
و ليه بـ يتضايقو لما مايعرفوش الدرجة ؟
وهل كونهم يقربوا ليّا يبئا دا يديهم الحق إنهم يتدخلو في اللي مايخصهمش ؟؟
فيه مليون طريقة للواحد عشان ينجح في حياته ويفيد الناس بعيد عن إنه يجيب مجموع كويس في الثانوية العامة

:S أنا مش عارف انهي اللي أنا كتبته دا ازاي
بس أرجو إن المجتمع ده يبدأ يحسن من نظرته للأمور عشان كدة كتير علينا والله
مش كفاية الثانوية العامة؟!     ـ     
يارب .

Saturday 21 July 2012

أيام كدة

0 comments
فيه أيام بـ ابقى داخل أنام ومش عايز اصحى تاني.. النهارده مايفرقش عنهم..     ـ

Saturday 14 July 2012

حكاياتهم: عن الإنتحار

1 comments
موقع يتيح لك إنك تحكي قصتك في جملة واحدة. 
قصص حياتك اليومية، قصص نقطة-تحول-في-حياتك، أو أي حاجة حصلت لك.

ودي بعض من حكاياتهم

معلش هما مش مترجمين لأن ترجمتي مش حـ تبقى على المستوى المطلوب
فأنا فضلت إنهم يبقو بـنفس الأسلوب اللي اتكتبو بيه
------------------------------------------------------


























Thursday 5 July 2012

أرض فضاء

0 comments
حطام، مقلب زبالة، وركنة لـ عربيات كل مرة بـ تختلف
ساعات بحس إن عقلي كدة..     ـ

Tuesday 3 July 2012

والآن، مع فقرة الساحر!!

2 comments


حاسس بألم رهيب؟؟     ـ
جرّب تموّت حتة جواك:     ـ
بوف!)     ـ)
الألم راح!!..     ـ

Tuesday 26 June 2012

تحديث 26/6

2 comments

يعني.. أنا قلت أغير من شكل المدونة عشان أنا زهقت من الشكل القديم
وبصراح الـ
Template
دي عاجباني أوي :)

المشكلة إنه عـ الـ
Internet Explorer
خربان خالص
- ودا شيء متوقع -

وعلى
RockMelt
في مشكلة في عرض الخطوط ومشكلة بسيطة في الجرافيكس

بس الحمد لله عـ الفايرفوكس
تمام التمام :)




أعتقد إن المشكلة حـ تبقى مع الناس اللي بـ تفتح المدونة من متصفح تاني غير الفايرفوكس
ـ قال يعني فيه حد بيفتح المدونة أصلا!! ـ
يارب بس تبقى شغالة كويس على جوجل كروم

يعني.. لو الـ
Template
دي مضايقة الناس أوي أنا ممكن أشيلها

من أجل المدونة والشعب والجماهير العظيمة.. الإمبريالية والتوسعية!!        ـ

--------------------------------------------------------------------------

تحديث 26/6

عشان القالب اللي فات ماكانش باين صح عند ناس كتير
فـ أنا غيرته لواحد تاني شغال مع كل المتصفحات :)

Tested on: Firefox 13.0.1
RockMelt
Internet Explorer 9

Friday 18 May 2012

4 comments
وحشتني المدونة أوي

 مستني الإمتحانات تخلص عشان أبدأ أحضر لـ بوستين نفسي أعملهم من زمان
ودا واحد منهم، دي جزء بسيط من الحاجات اللي حـ ادرجها في البوست
ودي مش الصيغة النهائية للكلام، أنا ناوي أعدل فيه لما أخلص بإذن الله لأنه شكله الحالي عامل زي محاضرة مملة..

-----------------------------------------------------






رغم جهود العلماء والمتطوعين أكثر من 400,000 طائر بحري، وحوالي ألف ثعلب ماء وعدد هائل من الأسماك قد قتلوا في تسريب نفط الناقلة "إكسون فالديز"، التي تعد أحد أكثر الكوارث البيئية التي سببها الإنسان تدميرا




حوالي 70 مليون شخص قد ماتوا بسبب المجاعات حول العالم في القرن العشرين




 يُقدَّر أن 5,891,000 مدني ماتو في الحرب العالمية الأولى بسبب المجاعة والمرض


المصادر
---------

Thursday 19 April 2012

Wisdom, Justice and Love

0 comments


I come to this magnificent house of worship tonight
Because my conscience leaves me no other choice.
A true revolution of values will lay hands on the world order and say of war:
"This way of settling differences is not just."
This business of burning human beings with napalm,
Filling our nation's homes with orphans and widows,
Of injecting poisonous drugs of hate
Into the veins of people normally humane,
Sending men home from dark and bloody battlefields physically handicapped and psychologically deranged,
Cannot be reconciled with wisdom, justice and love.

Cannot be reconciled with wisdom, justice and love.


 Wisdom, Justice and Love by Linkin Park


Wisdom, Justice, And Love by Linkin Park on Grooveshark

 -----------------------------------------------------------------------------

 الأغنية عبارة عن عدة مقاطع من خطاب "ما بعد فيتنام" للزعيم: مارتن لوثر كِنج

Wednesday 18 April 2012

4 comments
اكتشفت إني كل ما ب اكبر في السن..
حزني على فراق أصدقائي ب يتضاعف...
بكائي الحبيس داخلي يطول..
صراخي الصامت يستمر ل أسابيع..
دائما..
دائما كنت ابقى أنا و هم يذهبون..
يبتعدون.. إلي حياة أفضل..
و ابقى أنا وحيدا.. و أبدأ في رؤية ملامح عالمي الحقيقية..
أبدأ ب رؤية قسوته و شره و ظلمه...
لا يعلمون أنهم كانو من يبقوني سعيدا ب وجودهم..
مجرد وجودهم كان يبقيني سعيدا..
حتى الأشياء الصغيرة التي تجعل عالمي محتمل قليلا تذوي، واحدة وراء الأخرى 


 13/09/11

Sunday 8 April 2012

8 comments
سعادة شديدة تغمرني..
انتشاء روحي رهيب..
أشعر الآن بالفرق الشاسع بداخلي..
كأنه كان أرضا قاحلة ثم صار حديقة

 -----------------------------------------------------------------------------

بعيدا عن السخافات اللي بـ أكتبها هنا.. أنا راجع من لقاء المدونين وأنا مبسوط جدا
كان يوم تحفة D:
الحمد لله D :D:

Friday 23 March 2012

معادلة الإتزان

4 comments





تزايد الإختناق في وجود ذكريات صارت لا تعني شيئا وتسبب الألم عند تذكرها يدفع بالإتزان نحو النسيان
2 comments
لو كنت حوشت جنيه لكل كل لحظة حلوة قضيتها معاهم كان زماني دلوقت معايا فلوس تكفي اجيب مخدرات عشان انسى..

-----------------------------------------------------------------------------------------
المدونة دي نوعا ما تسجيل عقلي كان عامل ازاي في الفترة دي..
وأنا ب ابص ع الحاجات اللي كنت كاتبها لقيت القصاصة الغريبة دي..
أنا مش فاكر أنا كتبتها امتا بس حطيتها عشان ماتضيعش

Friday 10 February 2012

3 comments



نور: "ونر"، هو "رووون" فين؟
أنا بـ ادور عليه جوايا مش لاقيه
ونر: "رووون" مات!!..
نور: إيه؟؟!..أأ.. إزاي وإمتى وليه؟؟؟
ونر: لقى إن هو ماحققش الهدف من وجوده..
هو كان موجود عشان هما قالو إنك اتغيرت وبقيت أحسن..
مع بداية التغيير ده كانت ولادة "رووون" جواك،
وامتلاكه دفة قيادتك منّي..
(دا طبعا كان كويس عشاني وعشانك.. يعني.. ماينفعش افضل أنا اتحكم فيك.. أنا في النهاية حـ اوديك لسكة دمارك..
أنا ممكن ابقى عايش جواك.. بس ماينفعش أنا ابقى المتحكم فيك)

"رووون" كان عكسي تماما...
كان فعلا ماشي بيك صح.. شخصيتك معاه اتحسنت.
وجوده خلا تعاملك مع الناس أحسن..
مش قوي بس هو كان لسا في البداية.
لاحظ إن وجودهم في حياتك و وجود "رووون" جواك ماخلاكش تكتئب ولا حتى الإكتئاب عارف يخترقك.
وجوده هو اللي خلاك تعرف ناس جداد كويسين، ومعاهم هو كان بينمو فيساعدك تتغير أكتر،
ومعاهم برضه حسيت بسعادة ماحسيتهاش قبل كدة..

بس موخرًا بدأ يلاحظ إنك مابقيتش زي الأول..
لقى إنك كل ماتتكلم معاهم الحوار يقلب غم..
بتبقى بتتكلم معاهم عادي وفجأة تعمل حاجة تقلب الحوار لنكد..
لقى إنك بقيت بتضايق أعز الناس على قلبك بوجودك..
لقى إن وجودك وكلامك معاهم مابقاش بيفرحهم زي الأول..
لقى إنه مابقاش يحقق الهدف من وجوده، وكان متأكد إن وجوده جواك أكتر من كدة حـ يدمر علاقتك بيهم تماما..

إحنا عارفين إن هما بالنسبة لك بقو كل حاجة..
وعارفين إن دمار علاقتك بيهم حـ يدمرك تماما..
وجودهم في حياتك هو اللي خلق "رووون" جواك..
بس "رووون" لما لقى إن وجوده جواك أكتر من كدة ح يدمر علاقتك بيهم لقى إن أحسن حل إنه مايكونش موجود..
كتب مذكراته وخبرته وتعليمات عشان ماتتغيرش كتير من بعده وحطها في صندوق ودفنه جواك..
وانتحر!.....
نور: .....................
ونر: كان عارف إن دمار علاقتك بيهم وهو جواك أخطر عليك ألف مرة من وهو مش موجود..
فكان لازم يختار الحل اللي نتيجته أهون عليك.. وعليهم..
البقية في حياتك يا نور.. أو بمعنى ادق.. البقية جواك...........

Tuesday 31 January 2012

2 comments
 
بعد ما قعد شهر بيبعد الإكتئاب عن نفسه..
اكتشف إنه الحاجة الوحيدة اللي فاضلة له..
فـفتح له الباب و اخده بالحضن!..