Monday 10 September 2012

لقاء المدونين بإسكندرية 7/9/12

 الجمعة 7 سبتمبر 2012

النهارده لقاء المدونين في إسكندرية
صحيت الساعة 8
جهزت ونزلت، الجو رايق والدنيا هادية وكله اشطة
وصلت هناك عـ الساعة 10
ماكانش فيه غير أسامة الأزهري
 وعلى 10:30 كدة وصلت دودو (عاشقة الرومانسية) ـ

وبعدين وصل أستاذ أسامة (حواديت) بـ صحبة أحد أصدقاؤه
ومدام مرمر (ركن المرأة) و د. عصام (أحوال الهوى)  وإيمان (الحب الجميل) ـ
وضياء (بيبان) ـ (secret emotions) و سحر 
وقعدنا على كافيه** جنب القلعة
مستنيين بائي الناس اللي جاية من برا إسكندرية
واللي كانو متكعبلين في حوار السفر، بس الحمد لله وصلو عـ الصلاة كدة

ساعة الصلاة رحنا القلعة وصلينا في المسجد اللي فيها
وبعد ما خلصنا كانو اللي جايين من القاهرة وصلو
  اللي حضرو كانو ماما فاتيما و أبلة رشا عرابي*(لقد خلقنا الله أحرارا)  و أستاذ محمد متولي (رحلة حياة) و كابتن عمرو يسري (فضفضه) 
ـ (Gray Rose) و مستر محمود بهجت
و حروف كلاسيكية ،Emerald.Oasis و ناس تانية ماعرفش أساميهم بس مدوناتهم:  قوس قزح، و
و نبض إسكندرية، وطعم البيوت


قعدنا نلف شوية في القلعة
وبعدين طلعنا على تكا وقعدنا نتغدى و نريح مـ الحر ونتكلم وكدة 
وكان فيه واحدة جت يادوب قالت إسم مدونتها ومشت على طول 
 وكان نص اللي قاعدين مش عارفين الإسم والنص التاني ماسعمهوش كويس! :) ـ
المدونة إسمها: " بلاعة الحكومه تغنيك عن شبشب اللئيم "ـ

وبعد ما أكلنا بشوية عملوا حفلة عيد ميلاد أبلة رشا

والأزهري بئا كان ناوي يطبق عـ التورتة كلها (كالعادة يا جماعة، إحنا بـ نتكلم عن مين يعني) ـ
لولا دفاع دودو المستميت عن حق بائي الناس في إنها تاكل :) ـ

وبعد كدة رجعنا و ركبنا مركب

والجو بئا والغروب.. الحوار على بعضه كان وهم :)) ـ
وبعد كدة رحنا عند عزة اللي جنب القلعة وأكلنا ـ أكيد آيس كريم يعني مش محتاجة فقاقة ـ
وبعدين سلمنا ومشينا
وفضلت أنا مع عمرو يسري و محمد متولي وماما فاتيما وأبلة رشا  ودودو ومدونتين كمان
رحنا لحد محطة مصر وهناك هما ركبو المشروع وأنا روحت

أنا مش لائي كلمات توصف سعادتي باليوم ده
أنا بجد انبسط جدا النهارده
 :))))))))))))))
وشكرا لكل الناس اللي حضرتك وأنا اتشرفت بـ مقابلتكو :)   ـ
وإن شاء الله نتجمع تاني قريب

رووون


-----

(أنا آسف لو نسيت إسم حد من الحاضرين، أنا الذاكرة بتاعتي زي الزفت)
سؤال لأبلة رشا: حلوة أبلة دي؟ ـ *

قهوة: قلعة السيسي! ـ **
-----

9 comments:

مدونة رحلة حياه said...

السلام عليكم
احنا اللى اتشرفنا بيكم يا نو وبنشكركم على مقابلتكم وتعبكم معنا
عاوزك تكتب كتير
وتكتب كأنك بتلعب على الدرامز
اشوفك قريب وتملى بحير

فاتيما said...

يا لهوى على ماما فاتيما دى يا نور ... !!!


انا بحبك يا واد انتا
وبحب براءتك وطيبتك
وبصتك اللى كلها احترام وشياكة دى
وعجبنى جداااا البؤين اللى قولتهم ف الفيس
للناس اللى مجتشى

بجد اليوم كان حلو
والمركب كان ألطف جزء
وحوار تكا والسياسة والتاريخ
وميس رشا
احنا بنقولها يا ميس
متبوظلناش النداء الرسمى بقى
:))


كل مرة وانتا اول الحاضرين
واول نفر شوفته كان ازهرى ؟؟؟؟

كان الله ف عونك يا بنى
المرة الجاية تعالى آخر واحد بقى
:)))


ان شاء الله نشوفك احنا كمان قريب
يا تيجولنا يا نروحلكم
:))


بحبكم
وبحب اسكنكرية قوى

L.G. said...

هههههههه انت مصمم انها كافيه اتقى الله ديه قهوة بلدي
اليوم فعلا خاصة المركب كان جميل شكرا لأسامة اللي عزمنا على المركب
القلعة كمان كانت جميلة كالمعتاد ولو انها زحمة بس سبحان الله اليوم ده كل الناس كانت مبتسمة طول الوقت اعتقد السبب في المكان البحر والضوء ونسمة الهوا .. يمكن
انااسمي سماح مدونة
http://www.crystal-oasis.blogspot.com/
وكان فيه داليا قوس قزح وسالي شرف حروف كلاسيكية واسماء الدجوي انا كتبت الاسماء عندي :)
ممكن نبقى نعمل كل فترة تجمع تدويني ونعمله في رحلة بأتوبيس واحد بدل ما نستنى بعض
يوم جميل يارب يتكرر
تحياتي

Nour Sherif said...

مدونة رحلة حياه @
وعليكم السلام ورحمة الله وبركاته
إسكندرية نورت بيكم يا برنس
وأنا اتبسط أوي إن حضرتك حضرت اللقاء
:)))))))
وإن شاء الله ابئا أسافر أنا وأحضر اللقاء عندكو
:)))

أأ.. لو هكتب زي مابلعب عـ الدرامز يبئا حضرتك هتستنى تلات سنين عـ الأقل
بس أنا هحاول برضه السنة دي
:)

اشوفك قريب وتملى بخير

Nour Sherif said...

ماما فاتيما @

أأ.. أنا مش عارف أقول ايه بصراحة يعني
عاااااااااااااااااااااااااااااااااااا
:(((

اليوم كان حلو بـ وجودكم
:)))

احم.. ماشي، ميس رشا
أحلى تحية لـ ميس رشا ولـ قسم التاريخ
:)))

أزهري كان هناك من بدري أصلا

إن شاء الله اللقاء الجاي نبئا نسافرلكم احنا

إسكندرية كمان بتحب حضرتك قوي، ماتبئيش تغيبي عنها كتير بئا
:)))

Nour Sherif said...

@ L.G.

نورتي المدونة
:)))

بصي عـ الهامش تحت هتلائيني كاتب إنها قهوة، بس قلت بلاش أكتبها في البوست عشان ماحدش يتضايق
:)

أنا متابع مدونة حضرتك بئالي فترة

أنا عرفت المدونات كلها تقريبا بس ماركزتش في أسامي الأشخاص

إقتراح حضرتك كويس اسألي بقية الناس بخصوص الموضوع ده
:)

اشكر مرورك الكريم

فاتيما said...

عامل ايه يا نور ...
وحشتنى يا فتى
عارفة ان الدراسة وخداك
بس قولت آجى أرخم .. وأطمن عليك

يا رب دايما تكون بخير

:)

Nour Sherif said...

@ ماما فاتيما

ازي حضرتك

أنا تمام الحمد لله
متكعبل في الدروس بس بإذن الله ملحوقة

والله أنا اتبسط أوي بسؤالك
يارب دايما تكوني بخير وصحة وسعادة
:)

Mahmoud Bahgat said...

نوك نوك
احم فى حد هنا
معلش بقى انا جيت متأخر أوى بس لما لقيت اسمى موجود قررت ادخل اعلق هنا
الصراحة ما شاء الله عليك يا نور المدونة جميلة جدا و تصميمها شيك و انيق (عارف انها تيمبلتس عديها)و انا كمحمود اتبسطت انك كنور بتكتب حلو اوى كده بس نصيحة شيل صورة فيتنام دى الواحد اتسرع من الصورة حط لينك ندوس تطلع الصورة نموت على طول بلاش كلام فارغ
:))
على فكرة ده وش بيضحك عشان لو طلع بالمقلوب يبقى عيب الكيبورد
نشوفك دايما منور لقاءات المدونين يا نور

Post a Comment