Tuesday 31 July 2012

!جبت كام يا حبيبي؟

يوم صدور نتيجة الثانوية العامة ..     ـ     
حدث عالمي يتابعه المصريين من باب الفضول فقط
و يتابعه العالم عشان يطمئن إلى
إننا كل سنة بـ ننتج آلاف البهايم اللي مش نافعين بـ بصلة

آلاف الشباب المتوترين من ساعة ما خلصو امتحانات مترقبين اللحظة دي
طبعا احنا عارفين انها هتطلع على بالليل كدة

أنا ماكنتش حاسس بـ أي حاجة يومها
صاحي عادي جدا
رحت قعدت عـ الكومبيوتر عادي جدا
ولا حاسس بقلق ولا حاسس بـ أي حاجة
لا و ايه
كنت خارج مع قرايبي نتغدى برا كمان

المهم، أثناء وجودي مع قرايبي لسا
فتحت موقع الوزارة من الموبايل
قعدت بئا ييجي ربع ساعة بحاول افتكر/أكتب رقم الجلوس بتاعي  صح
أخيرا لما ربنا كرمني و كتبته صح كان فيه اتنين على الأقل اتصلو هزءوني على إني لسا ماجبتهاش
والحمد لله جبتها والمجموع كان كويس

و من ساعتها بدأت الائي كم هائل من الفضول البشري محيط بيّا
لاحظت إن الناس كلها بتسأل: جبت كام ؟
مش: عملت ايه ؟
وفيه فرق كبير بين السؤالين
قرايبي بئا عمالين يتصلو عشان يعرفو أنا جبت كام
وأنا ضايقني جدا كون إن كلهم عايزين يعرفو المجموع
مش هاممهم إني نجحت ومش مكفيهم إني أقولهم إني مجموعي كويس
فـ أنا قررت مااقولش لحد على مجموعي وخصوصا قرايبي
طبعا هما اتضايقو مني
ناسيين - أو عاملين عبدو - إن دي حريتي، وإن أنا من حقي اختار إذا كنت أقول للناس ولا لأ
رغم إن الناس دي برضه
مابتقولش هي جابت كام
ولا نعرف ولادهم جابو كام
ولا احنا سألنا ولا عايزين نعرف أصلا
رغم كدة هما عمالين يزنّو عايزين يعرفو

هي الناس ليه بتدور على المجموع بس ؟؟
هو مش اللي يهمها تعرفه بس أنا عملت ايه (نجحت الحمد لله) و أنا عايز اخش كلية ايه و أنا عايز ابئا ايه في الحياة ؟؟
هما ليه بيتدخلوا في اللي مالهمش فيه ؟؟
وليه الناس بـ تقيم البني آدم على أساس المجموع بتاعه ؟؟
مع إن فيه ناس كتيرة عظيمة ناجحة في الحياة و ماكانتش جايبة مجموع عالي في ثانوية عامة
و ليه بـ يتضايقو لما مايعرفوش الدرجة ؟
وهل كونهم يقربوا ليّا يبئا دا يديهم الحق إنهم يتدخلو في اللي مايخصهمش ؟؟
فيه مليون طريقة للواحد عشان ينجح في حياته ويفيد الناس بعيد عن إنه يجيب مجموع كويس في الثانوية العامة

:S أنا مش عارف انهي اللي أنا كتبته دا ازاي
بس أرجو إن المجتمع ده يبدأ يحسن من نظرته للأمور عشان كدة كتير علينا والله
مش كفاية الثانوية العامة؟!     ـ     
يارب .

4 comments:

فاتيما said...

معلش يا نور ..
الفضول
قاتل الله الفضول
وزى ما قولت احنا محتاجين وقت لغاية ما نغير نظرة المجتمع
وتقييمه للشخص حسب الشهادة ..
مش حسب التعليم اللى حصل عليه فعلا
لأننا دلوقتى معانا شهادات
لكن مش متعلمين بربعها ...


ربنا يوفقك ف اللى جاى كله
والحمدلله انى مش م الناس اللى سألوا ع المجموع
انا كنت عاوزة اطمن انك تمام
وان المجموع مش مضايقك وبس ...
لا اكتر ولا أقل

:)

ألف مبرووووك
وعقبال التخرج ان شاء الله يا فنان

Nour Sherif said...

الله يبارك فيكي يا ماما :)))))))

عقبال ماتفرحي بيوسف يارب :)))

حضرتك من الناس اللي عمرها ماهتضايقني لما تسألني عن مجموعي :)))

حضرتك فكرتيني بتويتة كان واحد صاحبي كاتبها، بتقول:
"بما إن الحد الأدنى لطب
99.1 %
أبشرو بعد ست سنين بدفعة من الأطباء
75 %
منهم حافظين مش فاهمين"

ربنا يستر.


‏-----
‏*أنا آسف والله لسا شايف تعليق حضرتك دلوقت

Unknown said...

حىن ابو حابىبى

Unknown said...

حىن ابو حابىبى

Post a Comment