أنا بئالي كتير ماجيتش هنا.. ويمكن آخر بوست نزلته كنت منزله من عالموبايل..ـ

بس عموما، أنا مش شايف اللي البوست ده ينفع بتكتب في مكان تاني..ـ

-------------------------------------

بعد حوالي شهر في الكلية، و وجودي وسط شلة من الشباب والبنات
لاحظت إن كل واحد  - سواء ولد أو بنت - ويمكن من أول يومين دراسة
بيتصاحب على حد، كل يوم بتشوفهم سوا لمدة اسبوع أو اتنين.. ويمكن المدة تطول عن كدة
وبعدين تلائيهم بعدو عن بعض أو مش بتشوفهم مع بعض زي الأول
وتلائي كل واحد فيهم اتصاحب على شخص مختلف
وبرضه يقعد معاه فترة وبعدين يسيبه..ـ
أنا برضه اختبرت الحوار ده

يمكن مش بسرعة زي بقية الناس
بس أعتقد إني برضه ماشي في السكة دي..ـ

هو الموضوع مش مضايقني.. أنا متفهمه جدّا

وفاهم إن كل واحد بيدوّر على حد يبقى صديقه
و...ـ
هو أنا بهري كتير ليه؟
ما اتكلّم في الموضوع على طول

أنا خايف اقضي مدتي في الكلية كدة..ـ
افضل اعرف ناس و اقضي معاهم كام اسبوع وبعدين نبعد..ـ
وبعدين اعرف ناس تانيين، وبرضه ابقى معاهم كام اسبوع وبعيدن نبعد..ـ
وافضل كدة.. عمّال اتنطط من شِلّة لـ شِلّة ومايبقاش عندي صديق حقيقي في الكلية دي..ـ
أنا ماصدقت اتعرف على شباب واخلص من وحدتي واكتئابي.. بس برضه حاسس إن معرفتي بيهم هتقف عند حد الزمالة..ـ
وعارف إن القلق الزيادة ده ممكن يخليني اتصرف على أساس إني هبقى بعيد عنهم فـ فعلا ابعد عنهم وابقى حققت اللي خايف منه..ـ
بس أنا مش هعمل كدة.. أنا هتعامل عادي جدا وأسيب الأمور تمشي لوحدها :) ..ـ

بس برضه..ـ
أنا خايف ابقى لوحدي!...ـ

بعد حصيلة يوم 2/9 من المفاجآت والصدمات والمشاوير بين زراعة إسكندرية وسابا باشا ومبنى الجامعة اللي عند المجمع عالبحر رحت النهارده وقدّمت في زراعة الشاطبي

يوم 2/9 كنت رحت عشان أقدّم.. أنا كنت مخلص ورقي كله، فاضل لي املي الملف واستمارة التقديم.. اللي صدمني وضايقني فعلا إن طلبة علمي رياضة اللي داخلين زراعة الشاطبي مش بيبقى قدامهم غير (هندسة زراعية) على مدى الأربع سنين، الأسوأ إن هندسة زراعية مافيش منه بالإنجليزي!ـ 

على عكس طلبة علمي علوم.. بيبقى متاح لهم الأقسام تانية باللغات التانية، بس مالهمش (هندسة زراعية)!ـ

مش عارف يعني هما حاطّين ازاي التقسيم ده، أصلا منهج ثانوية عامة مش حاجة تعتمد يعني..وهما حتى مش بيسألو (انتا جبت كام في الرياضيات/الأحياء؟) مثلا.. لأ طالما انتا علمي رياضة بيبقى هتخش هندسة زراعية أيا كان مجموعك في الرياضيات، ولو انتا كنت طالب علمي علوم يبقى هتخش أي قسم تاني بالإنجليزي بتاعه - إذا وُجد - بس مش هتخش هندسة زراعية أيا كانت درجتك في الأحياء..ـ

وكأنه صعب عليّ يعني اقرأ منهج الأحياء بتاع ثانوية عامة.. دا حوار سهل مش معضلة يعني..ـ

لما سألت في شئون الطلبة قالو لي جرب تسأل في زراعة سابا باشا يمكن يكون متاح لك أقسام أكتر

خدت مشروع على سابا باشا وهناك لما سألت عرفت إنهم السنة دي أول سنة يقبلوا طلبة علمي رياضة في الكلية.. أول سنتين هتبقى دراسة عامة والتخصص هيبدأ من تالت سنة، بس مش هيبقى متاح ليّا غير قسم (استصلاح الأراضي)!ـ

ولما سألتهم لو حبيت أحوّل من الشاطبي لـ سابا باشا اعمل ايه، قالوا لي اسأل في مبنى إدارة جامعة إسكندرية اللي في الشاطبي عند المجمع عالبحر 

ولما رحت هناك وسألت عرفت إني قبل ما أحوّل لازم كدة كدة أكون مقدّم في زراعة الشاطبي

وعلى أساسه.. رحت النهارده قدّمت في زراعة الشاطبي..ـ

أنا مش متضايق فعلا من هندسة زراعية ولا من استصلاح الأراضي.. الأولاني تكنولوجي أكتر وده مهم، والتاني شغله هيبقى عالصحرا وده مايقلّش أهمية برضه..ـ

بس ماحدش هيحب يحس إنه محشور وإنه مش متاح قدامه غير قسم واحد..ـ

عموما، لما نشوف الأمور هتمشي ازاي..ـ

4/9/13

يعني انتا متضايق إن الشباب مجاميعه نازلة رغم إنك عارف إن #المنظومة التعليمية بنت وسخة، و إن كل ما الطالب ينغمس فيها أكتر كل ما عقله بـ ينكمش أكتر
بس بدل ما تفرح إن شباب فلت من التخلف ده، لأ دانتا تزعل من كدة
رغم إنك مؤمن إن التعليم زي قِلِّته وإنه مالوش لازمة فعلا، بس لازم  الشباب تدخله وتكمل فيه لحد الآخر!ـ
يعني تبقى شايف الخرا قدامك وتتمرمغ فيه
من منطلق: إن ده النظام اللي في البلد، وإن كل الناس بتعمل كدة، و(وجدنا عليه آباءنا وأجدادنا)!ـ

ماتحاولش حتى تنتقد المنظومة دي وترفضها وتثور عليها، أو حتى على الأقل تشوف طريق بديل بعيد عن الخرا ده.. لأ دانتا لازم تكمل زي الحمار في الساقية وتكبر وتبقى زيّنا!ـ

من نفس المنطق ده.. الثورة كانت خروج غلط/محرّم على العادات وماكانش المفروض نسكت عليها.. كان المفروض نقتلها من ساعة ما بدأت.ـ


ـ#بيكوز_كسم_المنطق يا #حاجّة
ـ#أمي_الحبيبة
ـ#ثانوية_عامة

على الهامش:
أنا مبسوط فعلا إن الثورة ناكت الأجيال القديمة في أفكارها.ـ

وليه مانفضلش عايشين ونحاول نغير
أو عـ الأقل نبقى شوكة في ضهرهم
لحد مانعرف نغير
ولو ماعرفناش يبقى نربي الجيل اللي بعدينا إنه يغير
بس برضه مش المفروض نرمي مسؤوليتنا عـ اللي بعدينا
ما اللي قبلينا برضه عملوا كدة
وده اللي وصلنا لـ اللي احنا فيه دلوقت
إحنا اللي المفروض نغير
عشان نخلق مستقبل أحسن لولادنا
وإن ماعرفناش وهلكنا في وسط الطريق
يبقى اللي بعدينا مش هيبقى قدامهم غير نص الطريق

...

t = 1:40 am

الإحباط النهارده فشيخ..ـ

الناس اللي بتهتف للجيش والشرطة، انتو لحقتوا تنسوا؟
بـ أمارة ايه عايزين العسكر يحكموا وبترفعوا ضباط الداخلية على كتافكم؟؟
إنك تبقى ماشي في المسيرة وتسمع "الشرطة والشعب ايد واحدة" والضباط فرحانين و بـ يزيطو
هي الداخلية اتنضفت من الأوساخ اللي فيها؟
مش هما دول اللي كانو بيوقفوك في الشارع ويذلوك ولو تفّو عليك ماكنتش هتقدر تعمل لهم حاجة؟
مش هما دول اللي كنت تبقى خايف تخش عندهم القسم عشان تطلب حقك في إنهم يحموك لإنك ممكن ماتطلعش من القسم حي؟

و اللي عايزين الجيش يمسك البلد وبيهتفوا "انزل يا سيسي" انتو نسيتوا علاء عبدالهادي والشيخ عماد عفت وست البنات؟
يا متخلف انتا عشت 60 سنة في حكمهم مالكش صوت ولا تمن وهمّا اللي وصلوك لدرجة إنك لو مهاجرتش فـ أنت مش هتعرف تعيش في البلد دي
انتوا ازاي نسيتوا 28 يناير ومحمد محمود ومجلس الوزرا وذكرى محمد محمود و الإتحادية؟؟
هو دم البني آدمين رخيص عندكم انتو كمان؟؟



كلنا متضايقين ومحبطين من الوضع..ـ
وليد راح يقعد مع نفسه.. فضلت أنا مع جبر شوية وبعدين قمت اسمع الإشتراكيين الثوريين رجعت مالقيتوش.. أنا في سيدي جابر قاعد لوحدي في مكان هادي أوي بعيد شوية عن التجمع بتاع الناس..ـ


محبط فشخ ونفسي فـ أي حاجة تنسيني كل ده.. سجاير، خمرة، حشيش، أو حتى تعشير..ـ
بس أنا بعيد عن كل ده (مش عارف اتضايق من كده ولا اتبسط)ـ
أنا شكلي هفضل هنا شوية...ـ

There's a break in the wall
You can feel it
It's letting us all escape
So people tell me you need
The waking day
To fall asleep

اه بالمناسبة، كسّم مبارك والعسكر والفلول والإخوان واللي بيحترمهم.

t= 2:07 am

يسير عائدا إلي منزله آملا أن ينام فور وصوله عسى أن يستيقظ في الثامنة وينزل ليستكمل مذاكرته
ينظر إلى السماء، يقع بصره على نصف القمر الساطع
تذكر عندما رآه منذ بضعة أيام بدرا مكتملا..
حينما كان أمل أن يستطيع الانتهاء من مذاكرة الفيزياء مازال موجود بداخله..
لم تكد تلك الأفكار تمر بذهنه حتى غطت الغيوم القمر وحجبته تماما
لتذكره بأن الأوان قد فات.. وأن حلمه بـ "لمّ" المادة لن يتحقق أبدا
لم يتمكن من رؤية الغيوم و هي تنقشع لأنه كان قد بدء هبوط درجات النفق
آملًا أملًا واهيا أن يتمكن من إنقاذ نفسه ومستقبله من الإنحدار نحو الهاوية...

النهارده صحيت على 9 كدة
قلت فاكس واجب الدايناميكس دلوقت، المهم تذاكر الإقتصاد
ذاكرت حبة حلوين ونزلت درس الماث وأنا مش مخلص غير 6 مسائل بس
طبعا اتشطّفت قبل ما أخش القاعة! بس اهي عدّت على خير :) -
أنا مبسوط إني مانقلتش الواجب
الدرس عاجبني ومش عايز افرط في فرصة إني احلّه
* طب ماحلّيتهوش ليه من الأول يا عرص؟! *
مانا أصلي ضيعت الوقت اللي كنت المفروض أخلصه فيه في القعدة عالنت!
بس الحمد لله.. كنت لمّيت الإقتصاد كويس في الكام ساعة اللي قبل الدرس
أنا بحب أذاكر الإقتصاد قبل الدرس بكام ساعة
عشان ابقى فاكر كويس اللي ذاكرته

بعد ما خلصت الدرسين طلعت عالقهوة عشان اخلّص واجب الإحصا
ضربتلي سندوتشين فلافل محشية وكوباية بوريو
كنت حرّان فشخ النهارده، عشان كدة طلبته ساقع
( اه، القهوة دي بتعمل بوريو سخن! )
خلصت ييجي نص الواجب وبعدين روّحت
قاعد عالنت شوية وبعدين هنام
عندي بكرا 3 دروس، كانو هـ يبقوا اربعة لولا إني نقلت واحد ليوم الخميس
المفروض أنام بدري عشان عندي
Math 3
الساعة 8:30 الصبح
ياترى ممكن الاقي عربية فول موجودة الساعة 8 ؟
هنبقى نشوف
دروسي بكرا مش هتخلص قبل 8:30
يعني هبقى برة البيت ييجي 13 أو 14 ساعة كدة
ربنا يسهل
يلا تصبحوا على خير

6.4.13 11:36pm

المفروض كنت اذاكر النهارده واخلص الواجبات اللي عليا
بس ضيعت وقتي عالنت
أنا مابقاش عندي الحماسة إني انزل الصبح الكافيه اذاكر زي ماكنت بعمل في أول السنة
مابقاش عندي حماسة أعمل أي حاجة
عمّال بس اتفشخ في دايرة إني في ثانوية، بس مابذاكرلهاش، ومش عارف استمتع بحاجة لأني قلقان من السقوط، بس رغم كدة.. مابذاكرش برضه، ولا حتى بعمل أي حاجة تلحقني من المصير اللي أنا رايح له
عندي بكرا درسين
بس لسا ماخلصتش ولا واجب فيهم
بفكر بكرا بعد الدرسين اطلع عالقهوة اخلص واجب الإحصا
أنا بحب قعدة القهوة رغم إني بكره الدخان فشخ

حملة التدوين اليومي
دايما بتيجي حملات التدوين في أوقات بنت مرة ماتنفعنيش
أنا مافيش في دماغي حاجة
كل اللي عندي أفكار لقصص وروايات عمرها ماهتتشكّل الفترة دي وتبقى حاجة واضحة في دماغي اقدر أكتبها
أنا ماكتبتش حاجة من ساعة مابدأت الثانوية بنت المرة
الثانوية رمت تُقلها على كل حاجة في حياتي
ومابقيتش عارف استمتع بأي حاجة كنت بعملها
أنا كنت بكتب أصلا؟
أنا فاتح/سايب المدونة دي ليه؟
يمكن مستني اليوم اللي اكتب فيه حاجة تعجبني بجد

أنا واخد بالي إن لساني بقى زفر
بقى غير محتمل.. بس ماباخدش خطوة إني ابطّل أباحة

أنا بدأت فعلا أفقد الأمل في نجاحي السنة دي
يمكن أنا مش هزعل عليّا قد ما هزعل على كل اللي كان نفسي احققه وماعرفتش
على كل الناس اللي كنت أقدر أفيدهم
على العالم اللي كنت ممكن أخليه مكان أحسن
بس ضيعت كل ده.. عشان اقعد اعرّص في أهم سنة في حياتي

أنا حتى مش عارف اخطط صح لمستقبلي

أنا لسا ورايا مذاكرة إقتصاد عايز اخلصها قبل ما أنام
أنا بكتب كل ده ليه؟
فيه ناس كتير بحبهم هـ يشوفوا البوست ده ويتضايقوا من زفارة لساني
بس ده جزء مني.. موجود حتى لو ماكنتش موَرِّيهولك
وماعتقدش إني هحاول انضفه قريّب
مش قبل الثانوية ماتخلص عالأقل

أحا
مذاكرة الاقتصاد ماتمّتش وأنا عايز أنام
ولسا ورايا واجب دايناميكس كنت عايز انجزه بكرا الصبح
شكلي هـكرْوِت الواجب بكرا وهركز عالإقتصاد
ربنا يستر
تصبحوا على خير

5.4.13 11:15pm

ـ انتا زعلان؟؟

ـ مش متأكد.. أنا مش حاسس بحاجة

ـ بس في موقف زي ده الطبيعي إنك تبقى زعلان

ـ ممممم... بص أنا بعد حوار تاني كان لسا من اسبوع اضطريت اتخذ إجراءات عشان  
منكسرش.. بس يبدو إن اتغاشمت في رد فعلي ساعتها.. فـ بعد اللي حصل امبارح أنا مانكسرتش.. ولا بقت حاجة فارقة معايا.. ولا بقيت حاسس بحاجة.. ـ

وكأني حطيت كل حاجة مع احساسي في صندوق.. وقفلت عليهم ومافكرتش.. أو بحاول مافكرش في الموضوع

أنا زعلان من اللي حصل.. بس بعيد عنه... أنا عامة مبسوط

أنا حاسس إني فاضي من جوة.. بس أنا مش متضايق من ده أوي.. أنا يمكن كمان مستريح بيه.. ـ

أنا حاسس إني عامل زي أوضة فاضية ومضلمة.. حاسس إن جوايا بقى مجرد فراغ اسود

أنا.. تايه... ـ

هو صعب إن الواحد يحلم إنه عنده أرض و بـ يزرع؟؟! ـ

وبعد ما ميليشياته نزلت تعتدي عـ المتظاهرين في جمعة الحساب

وبعد ما ميليشياته برضه نزلت تعتدي عـ الثوار في الإتحادية

وبعد ما فرض ضرايب عشان كام مليار
مع إن جماعته قبليها بكام شهر كانت معترضة عـ القرض ده


وبعد ما تاجر بدم الشهدا عشان يفرض إعلان ديكتاتوري
والقتلة طلعوا براءة

وبعد ما كرّم اللي قتلوا شبابنا في محمد محمود ومجلس الوزرا

وبعد ما ساب الداخلية زي ماهي ومش بس كدة
لأ، دا بئا معاهم زي جديد ومدرعات جديدة وغاز جديد
وبتعمل نفس اللي اللي كانت بـ تعمله أيام مبارك
وكمان الضباط عايزين يبقى مسموح لهم استخدام التسليح الشخصي
ـ (رصاص حي) ضد الحجارة والمولوتوف

وبعد ما كذب بخصوص توافق الجمعية التأسيسية

وبعد ما كذب بخصوص كل وعد قاله وكل قسم قاله وماعملش بيه وبرضه هيفضل على رقبته

وبعد ما جاب فلول النظام السابق في حكومته
ومجلس الشورى

وبعد ما بئا الصديق الوفي لأحفاد القردة والخنازير

وبعد ما جاب كام واحد يتحكم عليهم بالإعدام
وساب الكبار بره السجن و ولا اتعمل معاهم أي حاجة

وبعد حفلة دوللي شاهين وريهام حلمي اللي برعاية الحرية والعدالة (وحزب الوسط)ـ

وبعد ضرب داخليته الغاز على الجنازة

اللي هـ يقول لي دين مرسي اسمه ايه ليه عندي جائزة قيمة
هـ اديها له في لقاء إسكندرية الجاي

الجوايز كتير وانتا أكيد كسبان
كل اللي عليك: تقول لنا دين مرسي يطلع ايه
اتصل حالا وقول لنا اجابتك على 56734 ـ
عشان تكسب جوايزنا
وتدخل سحب على تلات جوايز كبيرة

الجايزة التالتة: تبقى في الصف الأول مع الثوار
أثناء اقتحامهم لمقر الخرفان في المقطم

الجايزة التانية: تبقى في الصف الأول مع الثوار برضه
بس واحنا بنقتحم القصر الجمهوري


والجايزة الأولى: الإنترتيمنت كلها
تبقى في الصف الأول برضه
ومع نفس الثوار
بس المرة دي فين؟ في ميادين مصر
وهما بينفذوا المحاكمات الثورية في الفلول والإخوان
ايوة، في الفلول والإخوان
وكل القيادات الوسخة بتاعت الداخلية والمتأسلمين

كل ده لما تشترك في مسابقتنا
يلا بسرعة اتصل على 56734 ـ
انتا معانا كسبان كسبان

لا نخافكم فأنتم حقراء

Ⓐ

سيدي جابر، شارع أبو قير

إحنا في مرحلة بنت مرة دلوقت
ماعتقدش إننا مهما عملنا هنقدر نتخلص من سيطرة أمريكا علينا
أيا كان الرئيس اللي جاي هو هيبقى بيخدم مصالح أمريكا ضدنا
أمريكا مش هتسمح بوجود رئيس ضد مصالحها
وهي أكتر حد هيعمل على إجهاض الثورات في الدول
أي ثورة حقيقية هتقوم في أي بلد مافيش شك إن أمريكا هتساعد الحكومة إنها تجهضها
ماعادش قدامنا غير حل/أمل واحد عشان نخلص من السيطرة الأمريكية علينا
ماعادش قدام الثوار في كل دول العالم غير حل/أمل واحد
ثوار أمريكا
هما بس اللي هيقدرو يهدمو الكيان الأمريكي
ويهزّوه ويسقطو النظام الفاسد ده
ساعتها لما تقوم ثورة في أي بلد مش هيبئا على الثوار مواجهة حكومتهم وأمريكا، هيبئا عليهم مواجهة حكومتهم بس ودي مقدور عليها
ساعتها هنقدر نكمل ثورتنا صح
ونتخلص من المتأسلمين والنخبة والفلول والعسكر والرأسماليين وكل ولادة المرة اللي مطلعين ميتين أهالينا مـ العيشة في بلدنا
ساعتها ممكن تقوم ثورة عالمية نهدم فيها الحكومات الفاسدة والطبقة العليا الرأسمالية
ومش هيبئا قدامنا غير الحكومات بتاعتنا ومعاونيها سواء في الحزب أو المعارضه
ودول أمرهم سهل
ثوار أمريكا من غير نضالهم وصمودهم مافيش أمل تنجح أي ثورة في العالم
أنا عندي أمل كبير أوي في ثوار أمريكا
ومستني... ـ

في عالم موازي

في عالم موازي

وأنا طالع من الحمام بعد ما خدت دُش

اتزحلقت لـ ورا و وقعت على راسي

وجمجمتي اتكسرت

وآخر حاجة قلتها، كنت بغني:

I'm a messenger sent and I know it's in my head..

-------------

Headcase by Karnivool

قدامي 6 شهور على أول نقطة فاصلة في حياتي
عايز اطلع ايه؟
عايز ابقى مزارع
حاسس إن ده اللي أنا اتخلقت عشان أكونه
شايف إن كل بني آدم لازم يعمل حاجة تفيد كل البشر
- مش تفيده هو بس وفئة صغيرة من الناس -
بغض النظر عن هوايته أو ميوله
أنا عايز ابقى درامر
(Drummer)
في باند روك أو ميتال
بس ده الناس مش هتستفيد منه
ومش هكون قدمت حاجة للناس
مش لاقي نفسي في أي شغلانة و مش عارف هفيد الناس إزاي لو اشتغلت أي شغلانة تانية
مش شايف مستقبل يناسبني غير في الزراعة
ده دوري في الحياة وده اللي هقدمه للناس
بس أنا عارف إن كلية زراعة مش هتطلعني حاجة
وإن اللي أنا عايز احققه ده محتاج طريق تاني
عشان يبقى معايا رأس المال الكافي
ف عشان كدة أنا مش هخش زراعة (دلوقت عـ الأقل) ـ
مش عارف لسا هخش هندسة ولا علوم
بس أيا كان
أنا لازم الشغلانة اللي هشتغلها دي تكون برضه هتفيد الناس
أنا إن شاء الله لما يبقى عندي أرض
أول حاجة هزرعها هتبقى خضار أورجانيك
من حق الناس إنها تاكل أكل صحي
من غير مبيدات ولا كيماويات تفشخ صحتها وتجيب لها أمراض ماتتعدّش
لا وايه، عايز اعمل شركة مع شباب تانيين تخلى مصر مكتفية ذاتيا من القمح (شوف الخيال) ـ
أنا خايف جدا أموت قبل ما احقق ده
و حاسس إن عمري بـ يعدّي قبل ما ابدأ أي حاجة
آخر حاجة يتمناها البني آدم إنه يحس إني اتخلقت عـ الفاضي وإن وجوده مافادش حد وإنه زي قلّته

[لو كل بني آدم زرع السطح بتاعه وأرض اللي حواليه أورجانيك وأكل منه ولما يفيض عنده يوزع عـ الفقرا]

احنا ساعتها مش هنبقى شوية خرفان كحيانة
بنخدم الطبقة العليا ومش قادرين نعمل لهم حاجة بسبب ضعفنا
هما عايزينّا كدة على طول عشان يعرفو يتحكمو بينا
ويفضلو هما فوق
هما اللي معاهم الفلوس كلها، هما اللي عندهم الصحة،
وهما اللي معاهم النفوذ، وبيتحكمو في مصايرنا
واحنا راضيين إننا نكون خدامين عندهم بيشغلونا في ظروف خرا وبيدونا حبة فلوس ماتكفيش حاجة
و بـ يبوّروا أراضينا عشان يسكنو هما عليها
ونستورد إحنا أكلنا عشان ماعندناش أراضي زراعية كفاية
ولما نيجي نستورد هما اللي يستوردو وبعدين يبيعوا لنا بأسعار عالية ولما نيجي نزرع هما اللي يجيبوا لنا المبيدات المسرطنة
عشان نفضل فقرا، مرضى، وماعندناش طريق تاني غير إعتمادنا التام عليهم

حبر الإنتخابات اللعين

انمحِ

 ـ لن انمحي

انمحِ

ـ لن انمحي

 لم لا تنمحي

ـ لن انمحي

اللعنة :@ :@ :@ ـ

مش عارف أنا حبر ايه ده
اللي مابيطلعش بعد الانتخابات بـ 3 أسابيع

------------------------