Friday, 11 January 2013

قدامي 6 شهور على أول نقطة فاصلة في حياتي
عايز اطلع ايه؟
عايز ابقى مزارع
حاسس إن ده اللي أنا اتخلقت عشان أكونه
شايف إن كل بني آدم لازم يعمل حاجة تفيد كل البشر
- مش تفيده هو بس وفئة صغيرة من الناس -
بغض النظر عن هوايته أو ميوله
أنا عايز ابقى درامر
(Drummer)
في باند روك أو ميتال
بس ده الناس مش هتستفيد منه
ومش هكون قدمت حاجة للناس
مش لاقي نفسي في أي شغلانة و مش عارف هفيد الناس إزاي لو اشتغلت أي شغلانة تانية
مش شايف مستقبل يناسبني غير في الزراعة
ده دوري في الحياة وده اللي هقدمه للناس
بس أنا عارف إن كلية زراعة مش هتطلعني حاجة
وإن اللي أنا عايز احققه ده محتاج طريق تاني
عشان يبقى معايا رأس المال الكافي
ف عشان كدة أنا مش هخش زراعة (دلوقت عـ الأقل) ـ
مش عارف لسا هخش هندسة ولا علوم
بس أيا كان
أنا لازم الشغلانة اللي هشتغلها دي تكون برضه هتفيد الناس
أنا إن شاء الله لما يبقى عندي أرض
أول حاجة هزرعها هتبقى خضار أورجانيك
من حق الناس إنها تاكل أكل صحي
من غير مبيدات ولا كيماويات تفشخ صحتها وتجيب لها أمراض ماتتعدّش
لا وايه، عايز اعمل شركة مع شباب تانيين تخلى مصر مكتفية ذاتيا من القمح (شوف الخيال) ـ
أنا خايف جدا أموت قبل ما احقق ده
و حاسس إن عمري بـ يعدّي قبل ما ابدأ أي حاجة
آخر حاجة يتمناها البني آدم إنه يحس إني اتخلقت عـ الفاضي وإن وجوده مافادش حد وإنه زي قلّته

[لو كل بني آدم زرع السطح بتاعه وأرض اللي حواليه أورجانيك وأكل منه ولما يفيض عنده يوزع عـ الفقرا]

احنا ساعتها مش هنبقى شوية خرفان كحيانة
بنخدم الطبقة العليا ومش قادرين نعمل لهم حاجة بسبب ضعفنا
هما عايزينّا كدة على طول عشان يعرفو يتحكمو بينا
ويفضلو هما فوق
هما اللي معاهم الفلوس كلها، هما اللي عندهم الصحة،
وهما اللي معاهم النفوذ، وبيتحكمو في مصايرنا
واحنا راضيين إننا نكون خدامين عندهم بيشغلونا في ظروف خرا وبيدونا حبة فلوس ماتكفيش حاجة
و بـ يبوّروا أراضينا عشان يسكنو هما عليها
ونستورد إحنا أكلنا عشان ماعندناش أراضي زراعية كفاية
ولما نيجي نستورد هما اللي يستوردو وبعدين يبيعوا لنا بأسعار عالية ولما نيجي نزرع هما اللي يجيبوا لنا المبيدات المسرطنة
عشان نفضل فقرا، مرضى، وماعندناش طريق تاني غير إعتمادنا التام عليهم

2 comments:

re7ab.sale7 said...

الله
والله حلو اووي
طيب بس مين اللي هيعمل ده
انا وانت وهو
ومين كمان
يا ريت شوية بس مننا يفكروا كدة
مساء الورد

Nour Sherif Mohammad said...

صباح الفل :)
أنا عارف إن 3 بني آدمين عدد قليل أوي
بس أنا شايفها بداية كويسة للفكرة
يعني.. إذا ربنا وفقنا في الحوار ده
ساعتها نبئا نكلم شباب تانيين ونحاول نقنعهم بالفكرة

Post a Comment