Sunday, 30 September 2012

ميشو (18-8 2011 » 15-9-2012) ـ

 ـ ” يا هِرُّ فارقتنا ولم تعُدِ … وكنت منّا بمنزل الولد“ ـ
لـ ابن العلاف

---------------------------



كان أكبر اخواته في الحجم
وكانت ملامحه جميلة أوي
كان الوحيد فيهم اللي بيحبني
كان بيحب يقعد جنبي ولو جه ولقى باب الأوضة مقفول يقعد ينونو لحد ما افتح الباب وأدخله
ساعات كان بينام جنبي بس ده ماكانش بـ يحصل كتير ﻷني كنت بخاف اتغابى عليه وأنا نايم
 


لما كنت بـ ابقى قاعد عالسرير بذاكر أو بقرأ كان بيطلع جنبي
عشان اقعد اطبطب عليه
كان غاوي يجيلي وأنا مشغول ومش فاضي
لما كنت ابئا بـ اصلّي أو بـ اجهز عشان اروح درس الائيه جالي
 وكنت كل مرة بقول له "معلش يا ميشو أنا مش فاضي دلوقت لما هخلص هعمل لك كل اللي انتا عايزه
وكان فعلا بيستناني :) ـ
بس هو غالبا ماكانش بـ يعبرني غير لما بكون مشغول، لدرجة إني ساعات بفكر إن فيه شيطان جواه مهمته إنه يقطع عليا صلاتي أو يأخرني عن دروسي




ايه اللي اخرك يا نور؟؟ ـ )
معلش يا مستر أصل ميشو كان عايزني اعمل له مساج! ) ـ

---------------------------

لحد ماتعب.... ساعتها خس اوي وبئا هزيل خالص
رحنا بيه لدكاترة كتير كل واحد يكتبله على علاج مختلف
ماحدش عارف ماله وكلهم بيكتبوله على حقن وادوية وهما مش متأكدين من النتيجة
وفضلت حالته عمالة تسوء
يمكن احنا كنا عارفين إنه هيموت
بس كل واحد فينا كان معتمد على محاولات التاني إنه يطمنه
إن ميشو هيبقى كويس وهيرجع زي ماكان
رغم إنه عارف وهو عارف إن دا مجرد كلام مش هـ يحصل
بس كان لسا بيعرف يلعب ويجري
وبعدين مابئاش بيتحرك.. بقت حركته قليلة أوي

---------------------------

أمه ماكانتش راضية تخش الأوضه اللي هو فيها
حتى لما دخلناها كانت خايفة، بخت وطلعت جري
يمكن كانت حاسة بالموت وهو موجود في المكان

الجمعة 14/9/12
كان تعبان أوي وماكناش عارفين نروح بيه فين
النهارده أجازة وكل العيادات البيطرية قافلة
اشمعنى البني آدمين بس اللي العيادات مفتوحالهم كل يوم
فضلنا اليوم ده نقول له معلش يا ميشو بكرا الصبح هنوديك ﻷقرب دكتور
بس هو ماستحملش

يوم السبت الصبح
كنت قايم عشان اخلص واجب درس.
بعد ماقمت بفترة وأنا قاعد بنجز لئيت ماما بتقول لي إن ميشو مات
وﻷن مافيش مكان ندفنه فيه غير في الجنينة اللي جنب بيتنا فـ احنا قررنا ندفنه بالليل عشان ماحدش يشوفنا

---------------------------


12:15am, Sun 16-09-2012
أنا نازل ادفن ميشو دلوقت............ ـ

---------------------------

دا تاني قط تبعنا ادفنه في حياتي، هو أنا المفروض بئا اتعود على كدة ؟؟!..... ـ


Song by Max Richter on Grooveshark

4 comments:

Nour Sherif Mohammad said...

لكل ولاد المرة اللي اتضايقو لما عرفو إننا اربع قطط.. اهم بئو تلاتة
:'(((

فاتيما said...

للأسف يا نور
لازم تتعود طول منتا بتربيهم
وقررت تتحمل مسئوليتهم كاملة
ودا الطبيعى يا بابا
سنة الحياة

كان امور قوى
وصورته تحديدا
وهوه نايم على ورق المذاكرة بتاعك
تهوس بجد
وعندك ألف حق تزعل عليه


معلش


معلـــش


انا حبيت البوست دا قوى
حسيته كمان قوى
وكل حد بيربى قطط وبيحبها
هيلمسه قوى


معلش


تعيش وتربى
ويعيشوا ويبقوا كويسين
ومتزعلش عليهم تانى


صباح النور يا نور
:)

فاتيما said...

آه كنت هنسى

بيت الشعر تحفة
جبته منين دا يا شقاوة؟؟

تسلم نقاوتك

:)

Nour Sherif Mohammad said...

ماما فاتيما @

صباح الفل
:)


:)
يعني.. مش عارف والله أقول ايه


بيت الشعر عدى علينا السنة اللي فاتت كـمثال للرثاء في العصر العباسي الثاني

Post a Comment